الخلطه السريـة

^
^
^
السلآم عليكم


وش إسموهـ ياربيه .. بما اني من عُشاق العطور بجميّع أنوآعها [ النسائيه والرجاليه ]


مع إن فيه بعض من العينات  .. تنتقد الرجل اذا تعطر بعطر نسائي  .. او مرأهـ تعطرت بعطر رجالي


يعني مادري وش المشكله !


لأن عُمر العطورآت ماخصصت للرجل أو المرأهـ  .. وهالشي ماسمعنآهـ الا بالحقبات الآخيرهـ


وماوصل عندنا هنا الا من تالي


فـ صارت الناس تنتقد لو تعطر رجل بعطر نسائي

وأكبر مثال  زوج إختي  ..  دآيم مسبب لي قلق وأزمه



فـ من هالمُنطلق !

طحت بخلطه سريه  .. أو مثل مايقول الشعب المصري ( ضـربـة معلم )



طعباً مثل ماهو معروف ومتدآول


 العطور النسائيه باردهـ وهاديه وناعمه  .. والعطور الرجاليه قوويه وفوآحه


وكل الأثنين يعجبونن  .. بس يمكن العطور النسائيه بالصيف له طعم خاص


فـ صرت اسوي خلطه


رحت لمحل عطور عندنا بعنيزة أعرفه ( العليان ) << يستاهل من يسوي له دعايـه 


وأخذت منه علبه عطر صغيرهـ  .. فـاضيه جديدهـ  .. عشان مايكون له ريحه ولآ شي


وعبيت فيها عطر >  نسائي و رجالي <


Feminine + Feminism + Al Damaa white

^
^

أخذت من كل عطر .. ربع - ربع - ربع .. وعبيتهم بالعلبه الفاضيه


وسميته ( Free Man ) الرجل الحرّ <  بالصميّم ههههههههه


والخلطه ذي  !


والله العظيم لآقت نجآحات وآسـعه من المُجتمع اللي عايش فيه


سواء بالمُناسبات الرسميه - أو بالكليه - أو بـ إسترآحه الشباب  - أو حتى عند الأهل


مايدرون هذا عطر نسائي ولآ رجالي  ..  بس ريييحته رهييييييبه


لأن العطورآت مثل [ الألوآن المائيه ] ..  تخلط لون مع لون  ..  يطلع لك لون جديد


فـ نصحيه جربو هالخلطه ذي


شرررط إن تدعون لي

وترا ما أحلل رآعين المحلآت لو يستخدومنه استخدآم تجآري << صدقت نفسي خخخخخ

التسلب الأقـشر

^
^

سلآمُن عليكم جميعاً


اليوم وانا اقلب بالتلفزيون .. طحت على برنآمج يتكلم عن ( التسلآب )


وميّر اتذكر سالفة صارت لي قبل فترة وجـيزة


تعالو نرجع بالزمن إلى الوراء قليلاً  << ياشيخ تلآيط خخخخ


,

هذا سلمكم الله قبل عيّد الأضحى في أوآخر شهر 11 من عام 1431هـ


كنت في مزرعتنا جالس عند إخوي الكبير


المُهم وحنا فالين الفرشه .. وجالسين نسولف


فجأهـ قام إخوي وقال : بروح لمزرعة عمي اجيب سمآد وابرجع


عاد هنا ذبحتني النخوة والشهامه

 قلت : افا بس ..  تروح وأخوك الصغير موجود ؟


قعد ينآظر بـ إستغرآب !


قال : خلآص .. إذا رحت هنآك تلآقي ( رينو ) العامل الباكستاني .. كلمه ويعطيك الأغراض


وبيني وبينكم .. بدون مُبالغة والله .. يمكن حوآلي 7 سنوآت ماطبيت مزرعة عمي


مع إنها قريبه مابيننا الا ( كيلو مترآت ) قليله !



 لكن للأسف ساحب سيفون على صِلة الرحم خخخ


يعني يالله أتكرم وآحضر بالمُناسبات و العزآيم

,


الوكِآد

رحت للمزرعة .. وكآنت متغيييييرهـ قووة


طفيت السيارهـ .. ونزلت اخذ به جولة تفقديـة على الأقدآم < ماذبحنا الا اللقافه


كآن النخل طوويل و كثيير ومغطي على أشعة الشمس .. فـ رحت اتجول دآخل ارجاء المزرعة

وانا فاتح خشتي ومفهي بس اتفرج وعيوني طالعه من اللي اشوفه


طبعاً عمي درآهم تآجر .. مُهب مثلنا فقيرين خخخخخخخ << الله يـزيدهـ ويرزقنا


المُهم كنت اذكر ان عنده ( عُمال ) وآجد بمزرعته 


 بس استغربت وانا اتمشى ما صآدفت أحد منهم


المُهم

رحت لحوش الغنم

عاد انا احب اطلع الغنم  الصغار |  والآحقهن -  وألعبهن -  وأحطهن بحجري


أحسهم كذا زي عيالي خخخ   < كل هذا يصير وإخوي ينتظر اجيب له الاغراض


المُهم يوم جيت ابطلع من الحوش !

ومير القا التسلب واقف وراء الشبك .. ويطلع صووت خفيف وعيونه مسلطها علي


قلت : بس الحين يحسبن حرآمي ابسرق شي :(


ومير اخذ عصا واضرب الشبك وأقول : هش هش يالله هش ..واضرب العصا بالشبك عشان يخاف


لكن هيهات هيهات


ذا تسلب حرآسه .. مُهب تسلب شوآرع


حسيت من نظرآت التسلب وكأنه يقول : شين وقوي عين .. جاي تسرق وتهاوش ؟


فـ مادريت الا فجأهـ قام ينآبح و يحط ايدينه على الشبك .. ودهـ يدخل

هنا انا .. جاني مغص بطني من الخوف


قلت : عز الله نتف لحمي .. ومصمص عضامتي


فـ طلعت مع الباب الثاني للحوش .. ورحت اركض عشان اركب السيارهـ << الله يفشلك خخخ


المُهم طلعت اركض .. والتسلب ذكي ولد التسلب


على طول فهمها .. ورآح يجري ورآي

انا حسيت اني توهقت يوم طلعت من حوش الغنم 


 لأن السياره بعييييدهـ .. والتسلب جاي من بعيد ناوي نيه


فـ على طول تمسكت بـ أول نخله قدآمي ورحت ارقا فووووق

والله اني ماعرف ولآ اقمز جدآر بيتنا .. بس الخووف يعمل عمآيل



واجلس متمسك بالنخله .. والتسلب ينآبح تحتي


واحاول المس مخباتي .. عشان ادق على اخوي .. بس للأسف جوالي بالسياره


واقعد واقعد واقعد .. ماش التسلب ماعندهـ نيييه يتحرك من مكآنه


وانا حسيت اني تعبت ..  وأناظر الآض بعيييييدهـ .. وبديت ادووخ .. وإيديني توجعن


عاد هنا بدأت التخيلآت !


قلت : الحين بتعب ثمن بطيييح على الأرض واتكسسر .. ويجي التسلب يكمل علي :(


وابدأ اصارخ اصوت للـ عآمل : رييييينوووو .. رينووووووو < من قلب اصوت له فوق النخله خخخ


لكن لآ حيآة لمن تُنادي


خلآص شيئاً فـ شيئاً بديت استسلم للأمر الوآقع


وكآن كل ماتحركت يمين أو يسار .. قام الكلب ينآبح ويحآول يجي لمي فووق


لييين الحمد لله ربي فرجها


وجاء رينووو .. وطـرد التسلب



عاد بقاء مشكلة النزول ..  ماعرف انزل خخخخخ


اقوله :  ياخي ماعرف انزل .. يقول : كيف انتا يجي فوق ؟


والله مشكله

لييين جاء هو فوق لمي .. وقال انزل على شوي شوي انا تحتك


والحمد لله تمت العمليه بسلآم

ومن يومها جتني عقدهـ من التسلآب كله

الـفرآغ العاطفي

أثر الفرآغ العآطفيْ  , عادي مآ يموّت

شفنيْ أكتب آلشعر , وانا مآليْ حبيبه !

يَ الليْ تصوّت لـ الغلآ , إنتبه لآ تصوّت

ياخي الآدميْ مآ ياخذ إلا [ نصيبَه ]

العيد وموسم الحلآقين

^
^

جاء العيّد  .. وجت أزمة الحلآقيين  


أولاً : كِل عآم وأنتم بخييير  .. ينعآد علينا وعليكم بالصحة والعافيه ياربْ

,

ثانياً


ودي أطرح قضية  .. حنا غافلين عنها  .. أو بالأحرى مُتغافلين عنها


الأ وهي ( طمع الحلآقيين )


بالأول معروف إن ( الحلآق التركي أو المغربي ) أغلى من ( الحلآق الهندي أو البكستاني )


لكن الحين صار حتى أبو هنوود رآفع رآسه ويبي ياخذ مكسب زي التركي و المغربي

,

ماعلينا من هذا كِلووهـ


بـ ليلة العيد أو قبل العيد بيوميّن


ماتلقى لك مكآن عند أي حلآق  .. يعني ملزوم إنك ترص ساعه بالكثيير على بال مايجي دورك


فـ وش صار يسوي الشعب السعودي اللطيف ؟


صار يحجز عند الحلآق بالوقت الفلآني بسعر ( 100 ) ريال < فقط حجّز ! من دون السمكره اللي بالوجه


يعني تحجز بـ 100 ريال


وتجي تحلق  .. وتلآقي الحلآق  ..  يمرش ويلعب بوجهك بسسسرعه .. بس عشان يمّدي على اللي بعدك


يعني شغل ( لـمـصـقه ) وحووسة  .. وزود على تسذا تخسسر 130 ريال أو 140 ريال


,


يمكن ينط بعيني وآحد ويقولي  [ أنت شخص قعيطي وبخييل ماتفكر الا بالفلوس ] 


بالحالة ذي !



أيه بالله قعيطي وبخييل

ولآ يلعب علينا الهندي ولآ التركي ابو تنورة حمراء


,

أبي آفهم شي وآحد


130 ريال


إصبر يومين بس !


 وجهك طالع  .. كنه قِـشر كيوي خخخ


يعني وش بتستفيد ؟


ياخي أشتري لي أطلدز غترررة  .. ولآ يلعب علي هالأجنبي بالسعر ذا

فعلاً حـدث العآقل بمآ يُعقل

,

من نآحيتي انا شخصياً !



بالأوقات العصيبه اللي زي هذي ! 


صرت أدخل دورة المياة تكرمون  .. وابدا أتفنن بالحلآقه مع نفسي


صح مهب صآير نفس دقِـة الحلآق


لكن مره ومرتين وثلآث  .. خلآص تعوود على الوضع


خاصه إذا صرت تحب تسوي أكشن !


 مره أمحط الشنب


مره أمحط السكوسكه 


مره الشنب و السكسوكه كلها جميع  .. ويطلع وجهك تسنه مقفى بزر خخخ



أمحط = مُصطلح غبي شوي عند بعض الشباب ومعناهـ ( حلق )


,


يعني بالأوقات اللي تحس إن الحلآقين فاضين لك  .. رح حلق عندهم بسعر معقول وحلآقه مُمتازة


لكن بالأعيآد .. لآتقربهم أبد


إنتهىآ

مقـلبـتك يابووي :D

سلآمُن عليكم


كل شخص بحياته .. لآزم يآكل ( مقلب )



  سواء كآن من  اصدقائه - أهله - زملآء العمل .. إلخ



البعض منا يتقلبها بصدر رحب



والبعض منا يزعل ويتضايق



وطبعاً هالشي يرجع على حسب نفسيه الشخص

/
\

ماعلينا



حنا عندنا بالإسترآحه ..  لآزم ما تمر فترة ..  إلا وآحد مننا يآكل مقلب



تعودنا على هالشي ..  هو بالحقيقه مُمتع ومُضحك وفله



لكن هالشي له مردود عكسي ..  الأ وهو ( الـثقه ) .. صرنا ما نثق ببعض خخخ



إلى درجة الشاهي !



احياناً اصير انا اللي مصلحه ..  لكن ما اعطي وآحد يصب لي بياله شاهي ..  أخاف يسوي شي


/
\


مررهـ من المرآت



كالعادة جالسين بالاسترآحه ..  وكِل وآحد ماسك الزآويه ( بلآك بيري ) << هالمشكله ذي يبيلها موضوع خاص



المهم


اللي ماسك جواله .. واللي جالس ينغف ..  واللي يقلب بالتلفزيون ..  يعني روتيّن مُمل شوي



الوكآد


جلست افكر وش أسوي !



وكآن في وآحد نسميه ( فيدو ) رآفع ضغطي ذاك اليوم .. لأنه صورن وانا نايم بالشورت




فحبيت اسوي به .. فـنّت .. ( مقلب )




طبعاً بالاسترآحه ..  شباب لآزم حوسه ..  مفاتيح سياره + بوك + سبحه ..  كلش مجدوع بالأرض




أخذت مفتاح سيارته وهو لآهي مايدري



ورحت على طوول للسيارهـ !



جلست احوس وأحوس ..  والاقي ( شـنطة حلآقه )



قلت : كفووو ..  عز الطلب  



فرغت شنطته / مكينه حلآقه + موس + فرشة + فوطه + مقص << كلشش طلعته من الشنطه



وعبيتها / حصى لآهو بكبيير ولآ هو بصغيير .. ماشي حاله



وخليتها على وزن أغرآضه ..  عشان مايشك بالوضع خخخ



المهم رجعت للإسترآحه ..  وكأني توي جاي مكلم من براا < يعني بريـئ



مر اليوم الأول ..  الوضع عادي


مر اليوم الثاني .. برضو عادي

,


باليوم الثالث !



المغرب كنا جالسين انا واثنين من العيال ..  نتقهوى ونسولف



فجأهـ !



رجـف الباب ..  ودخل وجهه أحمرر و معصب



ويهاوش : من الكلب اللي حاط بشنطة حلآقتي ..  حصى ؟؟



والعيال أنوآع علآمات الإستفهام ..  وانا مسوي نفسي بريئ ..  أتـصدد  واشرب شاهي




قال : جالس ماسك سرا بالحلآق ..  ويوم جاء دوري ..  وجلست بالكرسي !

طلع الحلآق حصاته ..  قالي بستهزاء ..  حلوهـ أغرآضك .. وضحكو علي الزبايـن



,


انا تخيلت شكله وهو يقولنا السالفه



ضحكت ضحك مهب طبيعي ..  طبعاً كلنا ضحكنا ..  بس انا بشكل هيستري خخخخخخ

وقلت له ::  معليه يا صاح ..  تكبر وتنسى إن شاء الله 



ومن يومها وهو يتوعد انه يردها لي

والله يستر من الايام الجايه

this month is too bad

الشهر هذا من اسوأ الشهور اللي مرت علي السنه هاذي




كل بين فترة وفترة يصير لي موقف  - غبي  -  أو مُحرج  - أو صعب




الإسبوع اللي طاف صار لي موقف غبي شوي




كِنت طالع من البيت الصبح .. متجه إلى بريدة .. حيث تقع كُـليتي هنآك




المُهم كِنت طآلع متأخرر الساعه ( 7 وربع ) الصبح




ومُحاضرتي تبدأ ( 7 ونص ) يعني باقي 15 دقيقه




مدري هل يمدي أقطع مسافة 30 كيلو .. وسط زحمة السيّر .. ونظآم ساهر البايخ .. أو لآ !




الوكآد




قبل ما أفرق للخط السريع .. كِنت وآقف عند الإشارهـ .. وإستغليت الوقت ارتب نفسي و هكآ يعني




المُهم شـد إنتباهي ..عامل نظآفه ( بنقالي ) .. يكنس الرصيف وحالته يُرثى لها

قِلت بنفسي :: ياولد ورآهـ ما أتصدق للضعيف المسكين .. لعل الله يوفقني باليوم هذا


 << مُهب من عوآيدي ترا




فتحت البوك حقي !




لقيت فيه ( 51 ) ريال .. خمسين كآمله برآسه .. و ريال وآحد




ترددت الصرآحه




صعبه أعطيه 50 كآمله .. والله لو إني ولد وزيـر




وبنفس الوقت .. صعبه بعد أعطيه ريال وآحد .. حسيت إنه مايسوى




وانا بعُمق التفكيـر !




ولعت الإشارهـ ( خضراء ) .. والعالم ماصدقت خبرر .. بدت تزعجن بالبوآري




الوقت قصييير .. ولآزم أتخذ قرآري بسسرعه




أخيراً قررت إني اعطيه الريال هذا .. لأن الأعمال بالنيات .. مُهب بالريالات




صوت له بسسرعه .. وفتحت البوك وعطيته ومشيييت .. وطلعت إيدي اعتذر للعالم اللي ورآي

 < الصرآحه مقدرهم




المُهم مسكت الخط السريع مُتجه لبريدهـ العزيزة




و أول مادخلت بريدة .. صفطت عند أقرب محطه .. وقلت له عبي فـل




يوم عبا بنزين وخلص .. وجيت ابطلع له الفلوس !




فتحت البوك أدور الخمسين .. مالقيته .. مافيه إلا الريال




ياولد دبر منا ولآ منا !




ولآ والله مافيه إلا الريـآل .. وصورة الملك عبدالله ينآظرن ويضحك ..  ومايل عقاله من الضحك علي خخخخخخ

إنصفق وجهي .. وضاق صدري




قلت لرآعي المحطه ::  دقايق بسحب فلوس وأجيك




رفض يحسب إني بلعب عليه < ومن حقه يرفض




فصخت ساعتي وقلت إمسك .. البنزين بعشرين .. وساعتي لو تبيعه جابت رآتبك حق شهر


 < يـعني صدقـني خخخخ




وبرضو رفـض الهندي




إنقهرت وفور دمي .. خلآص بيحسب علي غياب عن المُحاضرهـ الأولى




وميّر أنزل للبقاله التابعه للمحطه




وفـهمـت ( اليمني ) إني مستعجل وصعب ادور صرآفه دآخل بريده وأرجع له من جديد .. عشان 20 ريال




عطيته بطآقتي الشخصيه .. وقلت :: متى ماطلعت من الكليه .. عطيتكم الفلوس




ورحت للكليه




وللأسف .. تم تغييبي عن المُحاضرهـ الأولى .. وخسرت 50 ريال .. وتقروشت بالمحطه




وعلى قولة القايل ::[  يـابو زيـد كِنـك ما غزيـت ]

إنتهى

تقهويـنـي

جَتنِي [ تِقهْوِينِي ] وَأنآ خخآطِري ششِينْ

والهمّ رآحْ وكنّ مآفـ الصصدرْ شششيْ

وِتآكِلْ حلِآ !!

وَأقولْ وِشْ لِهْ تِححلّينْ ؟

بَسسْ إبلِعِي رِيقِكْ ,, وِعقْبَهْ تِقهْـويّ

وَأنآ بششوفكْ بسسَ يآغَآية العِينْ

وِإنْ ججعْت رآحْ أقدَعْ مِنْ إخلِآصصكْ ششوَيّ

من العام مجروح

جرو

^
^

لي صآحِبْ بسبته بتطلّع الروح

خـبَـل - والليْ مولعة  فيّه خبّله

,

عآميّن تلمّح له مَع الجَد ومِزوح

وتِقولة : يا عنّتر تنآديـك عبّله

,

طآلْ الزمِنْ ! ثِم قالتْ | أغليّك يالوْح |

مَجروحِه مِنك جَرح مخآطِره عجّله

,

دنـق رآسه وقال : أنآ مِنْ العآم مجَروح

وآشـرٌُ على [ جـرْح ] مُبطي وسِط رجلّه

بـرائـة طفوله

^

كل شخص بالدنيا له صندوق خاص بـ ذكريات الطفوله


طبعاً انا ما اسمي طفولتي ( برآئـه ) .. لأني طالع من بطن امي وانا أغـمّز للممرضه


دآيم مسبب أزمـه لأهلي


كِنت مستحل التلفزيون اللي تحت ( بحكم إنه آكبر تلفزيون بالبيت خخ  )


آنسدح بالأرض رجل على رجل .. وفـلم كِـرتون يـنطح فـلم كِـرتون .. ليييين يطيح اللي بالـرآس


وأطلع بالحووش الاقي الوآلدهـ فاله الفرشه .. شاهي + كرآث


واكـل كرآث ( ايقاله سبانخ حق بـبـآي ) وأطلع بالحارهـ <--<< ماخذ مقلب بنفسي وانا بزر


أطـلع اتهاوش مع عيال الفنيخ وعيال القاضي .. لييين صارو يكرهوني بقوووة


رآح وقت بباي .. وجاء وقت ( العملآق الأخضر ) الفلم كرتون القدييييييم


كنت بالآبتدآئي انا وصديق لي اسمه أحمد .. آنـجس مخلوق على وجه الأرض


نسوي قصه بوقت الفسحه !


ايقاله هو الحرآمي يسرق فلوس فسحتي .. ثمن أنقهر انا واسوي نفسي معصب


اقطع ازآرير ثوبي .. وافصخ نعالي .. على بالي أتحول واصير وحشش 


 وابدأ الحقه دآخل ساحة المدرسه كني مهبول خخخخ


مُرشد المدرسه الله يذكره بالخير اسمه ( الهطلآني  )

كآن يكلم أخوي الكبير يقوله : ولدكم بالحالة ذي مهب متعدي ولآ 3 إبتدآئي !


بس تبقى ذكريآت جميله من عـبق التاريخ < مشكله يا نابليون

من أنا ؟

مالك عذر .. وفي روآيـه آخرى فهد <--<<  تذكرو هذا الأسم جيداً !

 لأنكم بتسمعون عنه قصاص ولآ مسجون بقضية سياسيه

 شخص كل يوم له طموح

مرهـ لآعب مُحترف بالدوري الأوربي .. مرهـ صديّق الملك .. مرهـ دكِتور نساء و ولآدهـ 

 مرهـ سوآق باصْ طالبات .. مرهـ رئيّس مُنظمة قرصنه وهكر ..  مرهـ خطيّب آنجلينا جولي

مرهـ مُصور عالمي .. مرهـ عَارض ازياء

وكل يوم يصحى من النوم .. تصحى معه أحلآمه وطموحآته اللي تعانق السحابْ

 بـ إختصار !

شخص مايدري وش وضـعه بالحياة